Mumtaz Orakzai
شاعر ـ ممتاز اورکزى
کتاب ـ زخمک
کتاب ـ زخمک
مخ ـ ۵۹
┈┈┈•✿❁✿•┈┈
بې وسي ده زړه مې وران دى، زړه يې وران دى
ګونګ ولاړ يم کابلى جانان روان دى
ـ
د تورخم مزي ته ګورم، چورت وهمه
په جنت راج چلېدلى د شيطان دى
ـ
ناشناس مې دى په روح کې راګډ شوى
سر أهنګ استاد بيخي راباندې ګران دى
ـ
زه له تا شم صدقه جلال اباده
تاته خپل جسد سپارلى باچا خان دى
ـ
چې د ننګ کيسه کوم نو سر مې ټيټ شي
له اټک تر کندهاره يو افغان دى
ـ
که څوک وايي تېره نيمه پيړۍ څه وه
وايم دا زما په وينو سور داستان دى
ـ
يو نوروز به مې کابل کې وي ممتازه
خداى کريم دى او زما دغه ارمان دى
Comments
Post a Comment