Prof Bakht Zada Danish

غزل ـ پروفيسر بخت زاده دانش 

ملنګه په کچکول کې دې روپۍ دي او که بل څه 

په غاړه دې جامې د ملنګۍ دي او که بل څه 

ـ 

ته راوړه په دې لاسو دې څه سپينې سپينې ښکاري 

ته راوړه په دې لاسو دې پولۍ دي او که بل څه 

ـ 

دې بعضو بعضو خلکو په تنديو داغونه جوړ کړل 

چې دا يې نښانې دې بندګۍ دي او که بل څه 

ـ 

 صاحبه! ته لږ غوږ شه څه ډېر خوږ شان اواز راغى 

ته پام وکړه کړنګېږي چې پيالۍ دي او که بل څه 

ـ 

دانشه لر او بر درنه ځارېږي قربانېږي 

چې دا دې کرامات د شاعرۍ دي او که بل څه